МЭДЭЭ, МЭДЭЭЛЭЛ

БОРЦ ХИЙХ АРГА

БОРЦ ХИЙХ АРГА

Монголчууд өнө эртнээс идээ ундааны өвөрмөц соёлтой ард түмэн байсны нэгэн илрэл нь борц хийх арга юм. Ихэвчлэн өвлийн идэшний цагаар ес эхлэхээс өмнө мах борцлох бөгөөд хонины мах удах тусам чанар нь мууддаг, адууны мах хадгалалт даадаггүй тул борцолдоггүй. Голчлон үхэр, тэмээний махаар борц хийдэг бөгөөд ямааны махаар хийсэн борц удах тусам эмийн чанартай болдог хэмээн үздэг. Мөн ангийн махаар борц хийдэг. Гэхдээ гахайн мах амархан хуршдаг тул борц хийдэггүй. Буриад, Хамниганчуудын дунд загас борцлох нь бий. Борц хийхдээ махыг яс, шөрмөснөөс нь салгаж ширхэгийн дагуу уртаар нь зүсэж шүүс нь тунахад хэцэнд зүүж, уринд өгч хатаадаг. Ингэхдээ шүүс нь ууршиж, хар өнгөтэй, хатуу болдог тул наранд дэлгэдэггүй. Сүүдэрт тавьбал чийг авч үнэр орж муудна. Зуны цагт шар шүүсэнд /шар ус, цагаа ч гэдэг/ дүрэх, давслах, гурилд өнхрүүлэх, аргалын галд утах зэргээр үнэр оруулахгүй, хурдан эврээх олон арга хэрэглэж борц хийдэг. Борц чийггүй болж хатахад, даавуун уутанд сийрэгдүү хийж хадгална. Сайн хатаасан борц цайвар бордуу өнгөтэй, өөх нь шаргалдуу, өвөрмөц үнэртэй байдаг бөгөөд үхрийн борц 3 жил чанараа алддаггүй гэдэг. Монголчууд “үхрийн махыг үнхэлцгэнд нь багтаана” гэж ярьдаг нь талаар хэрэг биш бөгөөд борцыг гурил болтол нүдэж нунтаглаад бага багаар жигд нягтруулан чихэж, давсганд нь хийж хадгалдаг байна.

Хуваалцах:

Share on facebook
Facebook
Share on twitter
Twitter

“НҮҮДЭЛЧИН” ДЭЛХИЙН СОЁЛЫН ФЕСТИВАЛЬ

“Нүүдэлчин” Дэлхийн соёлын фестивалийн удирдамж, гарын авлагыг эндээс татна уу